O Sistema Amara Berri

A rede de escolas que recibe o nome de Sistema Amara Berri é un conxunto de 19 centros educativos que destaca por apostar pola innovación dentro do sistema da educación pública.

               O que me atrae deste sistema é o tipo de aprendizaxe que promove, no que a finalidade é que o alumnado adquira coñecementos a través de experiencias reais. As materias trabállanse de maneira interrelacionada e o alumnado está agrupado en aulas de maneira internivelar. Estes dous aspectos parécenme vitais, xa que, por unha banda o alumnado traballa varias materias do currículo a través de tarefas prácticas reais, conseguindo así que o alumnado sexa capaz de conectar contidos e de entender cal é a súa utilidade na vida real; por outra banda, estáselle ofrecendo ao alumnado unha aprendizaxe individualizada na que se están a respectar os diferentes ritmos. Cómpre sinalar que neste sistema non se utilizan libros de texto, e cada estudante elixe a temática na que quere afondar. A/O propia/o estudante busca na biblioteca información que lle poida ser de utlidade, selecciona as ideas principais e deféndeas oralmente ante o resto de alumnado.

               As aulas están organizadas en recunchos, o que facilita o mencionado anteriormente, o ritmo de aprendizaxe e os propios intereses. Isto, ademais, permítelle ao alumnado traballar tanto de forma individual como por parellas ou pequenos grupos.

               Outro aspecto que me resulta curioso é o da avaliación, pois os traballos e creacións do alumnado expóñense ao resto do grupo, e encárganse de realizar os comentarios pertinentes para a mellora do produto. Mesmo as nenas e os nenos que ven dificultades noutro alumnado comunícanllelas ao profesorado. Deste xeito o seguimento é moito máis obxectivo.

               Coido que é de vital importancia que o alumnado aprenda na aula a través de experiencias reais, pois é a única maneira da que poden ser conscientes de como deben desenvolverse no exterior do centro educativo. Tamén é unha vantaxe que as materias se ensinen integradas e non parceladas, desta maneira o alumnado será capaz de establecer relacións entre diferentes temáticas e a súa aplicación na vida real.

               En definitiva, este sistema ten un amplo beneficio no alumnado, non só este é o centro de atención, xa que hai unha clara atención personalizada por parte do profesorado, senón que tamén se está a construír un alumnado autónomo, así como cooperativo.